韓劇《戰神風暴ATHENA》女星秀愛，0依家同《宮》男星朱智勛拍緊SBS新劇《假面》，秀愛喺今日凌晨時份拍攝途中發生交通意外，隨即佢被送到醫院檢查，幸好秀愛只係腰部同右腿輕微受傷，經過治療後佢就馬上出院，並即時返回現場繼續拍攝。

唔少粉絲得知秀愛受傷消息後都叮囑佢要小心啲，又戥佢仍然要繼續拍攝而辛苦。《假面》將於本月27號首播，由於韓劇多屬邊拍邊播，所以秀愛只好即刻返回片場繼續拍攝。

除了秀愛拍劇受傷外，憑韓劇《Healer》而人氣急升嘅池昌旭，原來喺日前演出音樂劇《那些日子》時亦發生意外，話說喺上月池昌旭演出音樂劇時，有觀眾拍到原本佢喺台上又唱又跳，點知下一秒佢卻失去重心向前跌倒，整個人仲跌落舞台，隔咗幾秒佢就故作鎮定返回舞台，該段視頻近日曝光。

唔少粉絲見到當日池昌旭跌落台嘅片段都嚇咗一跳，好彩佢最終沒有大礙，粉絲先放下心頭大石，又大讚池昌旭嘅表現淡定，真係好專業，而有粉絲亦於今日拍到池昌旭今日現身晉州為音樂劇做準備，只見佢應該沒有大礙，繼續專注工作。