電腦丁、公關靚女M約老友食晚飯,叫左丁山到西環「尚興」,左丁山都唔知呢間飯店嘅正確位置,當然係搭的士,由中環去,原來好近,的士費只係十五蚊,咋一聲就到;不過公關M與公關大姐大就杰咯,自中環揸車去到門口,冇車位,於是兜兜轉轉搵停車場,搞咗三十分鐘,再步行到「尚興」,路程遙遠,行到花容失色!
左丁山亦摸錯門口,因為一落的士,只見皇后大道西三十七號至三十九號,有兩間尚興,一間兩興,究竟去邊間呀,惟有打電話搵電腦丁,先知三十九號嗰間至係。上到去閣樓,地方唔大坐滿晒人,又有人排隊,生意好到不得了,電腦丁又話張永霖坐喺隔籬房,可見呢間潮州食店早有名聲,不過左丁山少去西區食飯,唔熟架步而已,再睇吓牆上相架,有李國寶、張敏儀以及好多演藝界人士嘅簽名,就知道呢間小店馳名遠近。
電腦丁話:「食完唔好寫呀,否則以後更難訂位!」唉,香港人最叻識食,邊度好食,就一傳十,十傳百,使乜啲專欄作家吹捧吖;不過名人幫襯,效應亦好厲害,好似元朗大榮華咁,自特首、陳方安生去食飯曝光之後,晚晚爆棚,三個禮拜前訂位,亦只能坐大堂中座,冇「貴賓房」,星期一至星期日,晚晚如是,餐飲業不景喎,去完大榮華、尚興,你一定唔信有呢回事;究竟內裏有何原因,張宇人可代表佢啲選民去研究吓。