任賢齊（小齊）同謝安琪(Kay)今日喺尖沙嘴出席「單車百萬行2015」記者會，佢哋騎住單車進場，仲透露會參與呢個活動。

小齊呼籲大家參加單車百萬行，一定要注意安全，唔好自拍以免發意外。問到Kay會唔會一家三口參與﹖佢笑住話：「佢哋好忙，阿聰拍劇，張瞻仲忙，又功課又應酬。」講到上周二係Kay同張繼聰結婚八周年，Kay就話因為佢兩個都要開工拍劇，所以冇慶祝，不過依家就多咗見面，經常喺錄影廠入面對稿，Kay話：「平時得佢一個人拍劇，我會喺屋企等佢返嚟問佢『肚唔肚餓﹖煮個麵你食。』依家可以見多幾面就唔使煮麵。」估唔到人妻Kay入咗大台拍劇之後，連日常對白都咁大台。

至於小齊指香港好少有踩單車嘅地方，所以返到台灣先教囝囝踩單車，佢話：「佢好快學識，搞到我冇乜成就感。」Kay就話：「張瞻都好快識，我仲可以同邊個踩呀，所以我都有喊到。」農曆新年就快到，小齊表示會返台灣過年，而且仲要進行電影《澎湖灣》嘅後期剪接工作。

對於佢o依家拍緊杜琪峯新片《樹大招風》，小齊話：「導演話有補戲，好恐怖，拍杜生啲戲拍幾年都拍唔晒。」記者笑指拍王家衞電影會仲耐，小齊哈哈大笑話：「都係，比上不足，比下有餘。」