【林海峰開騷】睇住細女M痛乸口乸面似死老竇：但我仲生勾勾
蘋果日報 2019/09/20 10:50
林海峰林泳M痛林清林海峰是但噏Happy Monday
一連7場的林海峰（Jan）的Talk Show《林海峰是但噏Happy Monday》，全晚Jan除不時隱喻香港現時的社會狀況外，亦有提到跟太太彭羚和兩名女兒林泳（19歲）和林清（15歲）的日常生活點滴，他提到有日發現大女穿的裙子相當短：「佢19歲人着啲裙好似得幾歲咁細條，又薄又輕又短，我睇到心都跳埋出嚟，然後我老婆行出嚟話『十九歲係咁㗎啦！』你知而家啲男仔，十幾歲嘅靚仔我以前都經歷過，啲男仔真係好鬼污糟，去完小便唔洗手又周圍抹。」道盡為人父的心聲。
睇到細女初經歷生理週期時的情況：「我返到屋企見到佢乸埋口面坐喺度慘叫，以為佢食錯嘢，我老婆就行出嚟話十幾歲嘅細路女，Auntie（月經）嚟係咁㗎啦。」Jan形容都是細女當時痛到像「死老竇」般，他說：「但明明佢老竇，即係我仲生勾勾喺佢面前。」
Jan慨嘆19歲和15歲的女兒遇着正接近更年期的他注定「攬炒」，他舉例一家人到餐廳食飯女兒不讓他點餐：「Daddy你唔好次次都揸晒主意，畀我哋自己揀啦，於是佢哋兩個就同媽咪一齊睇餐牌，仲要每睇一行反一反我眼， 最後點咗啲係我平時一樣會點嘅餸。」
Jan又表示有日太太決定養狗，見她在家為狗梳毛，笑言自己突然變成寵物傳心師，聽到犬兒跟自己講說話，他扮狗說話：「你太太真係好手勢，唔好意思霸住你老婆，真係好舒服。跟住太太同我講好舒服，我係冇聽過太太同我講好開心好舒服，肯定冇，有嘅！但有細路之後就冇講過，只係話我好眼瞓。」
後來太太更有意想抱狗上床睡，他說：「老老實實3個我係有諗過嘅，但唔係同狗。」有感家中寵物影響自己生命，笑言以其人之道還治其人之身，趁家人不在家時為狗梳毛，女兒們回家時大嗌Daddy：「我聽到有人嗌我，全家人叫我，十幾年來第一次，感覺到自己存在。」
到Encore部份，Jan與嘉賓黃秋生、葛民輝以辦公室不同角色出場合唱，當成公司的飯敍，歌詞都是鼓勵一班打工仔，就算再辛苦都要努力、奮鬥，秋生見現場很多觀眾在場，即講笑謂：「咁多人喺度嘅？合唔合法㗎？」因秋生扮演廣東話發音不純正的經理，笑言觀眾今晚「好high」卻像說粗口諧音。另外，為配合表演，秋生在台上表演吹口琴、葛民輝彈Ukulele，最後眾人合唱陳百強的一曲《疾風》作結。
採訪：曹家誠、王連連
林海峰在Talk Show中再次講到妻女，說話中講出為人父的心聲。
Encore部份，有黃秋生、葛民輝登場。
黃秋生所演的角色有鄉音，令說話似說粗口諧音。
林海峰今次Talk Show以辦公室為主題，講出打工仔各種心態。
趙學而昨晚支持林海峰，心口驚見「排骨」。
黃秋生、葛民輝擔任表演嘉賓。