大市昨日又再表演拗腰絕技，恒指曾急挫成450點，但午後一個大車身，唔單止反跌為升，仲有230多點進賬，恒指收市重上17000點大關，報17022，升232點。
恒指已重上10日線（16952）之上，而250日線亦已回落到17237水平，若有大成交配合，恒指有機會再次衝關，收市若能破位而上，短期可向18000點大關推進。
大市向好，一向唔受股民歡迎的供股，反而成為好消息。五礦建設（230）宣佈供股，昨日下午復牌，股價反大幅上升，一度搶上1.26元，比停牌前的1.04元，大升21%，收市1.15元，升幅仍有10.5%。而唔少供完股或正在供股中的股票，股價亦都大幅回升。
滙控（005）供股完成後，股價大升，供股價28元，近日高價見69.40元，大升1.47倍，捧場客大有所獲。大藍籌咁醒，股仔亦唔失禮，亨泰（197）2供1，每股供0.18元，下禮拜開始收錢，近日股價亦已大升，由宣佈供股後的低位0.211元升到上0.375元，上月底在0.25元任你買，又係賺到笑。
勝獅貨櫃（716）又係供完股後大升的例子，1供2，供股價0.35元，噚日高收0.81元，升4仙，創出供股後收市新高，今次破位而上，短期上升目標指向1.15元。
勝獅未宣佈供股前，股價徘徊在0.80元水平，連埋供股，每股成本為0.50元，現時升幅都只係60%。近一兩個月，好多實力股仔嘅升幅都以倍計，勝獅明顯大落後。

集資減債利好

勝獅供股集資近5億元，主要用作減債，係為公司好，供股後淨借貸比率回落到42%的較低水平，以往股價長期受高債困擾，升唔起，鬆綁後果然彈力十足。
08年度（12月年結），勝獅營業額13.8億美元，減10.4%；股東應佔溢利451萬美元，大減86.7%，除全球經濟放緩影響集裝箱製造業務外，公司亦為解除掉期衍生金融工具虧損1700多萬美元，以及另一宗的公平值變動虧損1300萬美元，幾乎撇盡。
09年展望，公司有信心下半年經營可好轉，最主要係不會再有金融衍生工具虧損，甚至可能會回撥，盈利料可大幅回升。供股後，勝獅每股資產淨值1.36元，以目標價1.15元計，仍有折讓，仲比平均幾成溢價的同類股吸引。
郭兆誠