有志於政治嘅，或可考慮，做助理助理、助理，競選區議員，最後競選立法會議員，晉身行政會議成員，競選特首，二十四歲開始，五十四歲做特首，算唔算發夢呀？起碼有得諗先，唔係倔頭路。競選輸咗又點？咪屢敗屢戰囉，選咗呢條路，千祈唔好望發達，做中產都係掹車邊啫。如果認為呢條路太辛苦，不如就下海從商，四十五歲發達，成為名人，發到好似羅康瑞咁，仍然有希望競選特首。
富貴議員助理聽左丁山咁講，忍住笑話：「唔好講到咁長遠，我只係想有份糧嚟供樓啫，老闆如果不能連任，我就會失業，要搵過第二份，所以我嘅眼只睇到四年，唔係三十年。」