金融海嘯令打工仔搵少好多，工聯會旗下香港民用航空事業職工總會計劃首次調低會費，幫會員慳啲錢，副秘書長葉偉明同八方講，現時民航工會會員年費96蚊，由於唔少會員被減人工，工會都要共度時艱，所以會費減價，一來留住會員，亦可減輕佢哋負擔。

年費加到約60蚊

工會暫時未決定減幾多，但減20元至30元相信冇走雞。民航工會係工聯會其中一個大會，有成5,000會員，每人收少30蚊，一年就唔見咗10幾萬元，不過葉偉明話會加開培訓班開源，有信心補番筆數。
唔係個個工會減會費，工聯會旗下嘅社區、社會及個人服務業（新界西）總工會，最近就逆市加一倍會費，該會唔係獅子開大口，而係以前年費僅30蚊，其他工會覺得有人頂爛市，所以呢個會惟有加會費到市價約60蚊一年。
工聯會理事長吳秋北話，家工聯會有32.4萬會員，目標本年底前加到34萬人，佢話搞工會應該加強服務，會費鬥平冇意思。