19歲的鄭欣宜近日為殺入樂壇鋪路，拜劉家昌為師學唱歌，昨日更充滿自信地公開獻唱師傅的作品《一切來自愛》。雖然曾因扮白雪公主及親吻吳卓羲，令廣管局接獲多宗投訴，但欣宜無懼壓力和攻擊，表示入得娛樂圈，「呢啲新聞就係一個package」。屢遭網友攻擊，欣宜自稱「冇做錯」，又表明將退出blog界，以後轉寫日記。

劉家昌昨日帶同兩位學生鄭欣宜及向華強之子向左（前名向展平），到銅鑼灣保良局出席「保良之歌」公布儀式。欣宜和向左在活動上聯同10多名小朋友，一同獻唱由劉家昌創作的《一切來自愛》。過去多次演出均備受嘲笑和抨擊的欣宜，仍然決心殺入樂壇，更特地拜劉家昌為師學唱歌。未知是否太緊張所至，昨日欣宜演出初段竟忘記開咪，不過小小意外並沒有令她手忙腳亂，自信十足地演繹國語新歌，水準不俗，在座嘉賓均報以掌聲。

監管母親
「佢糖尿病又唔戒甜」

猶記得去年欣宜在《兒歌金曲頒獎典禮》中扮公主，向吳卓羲獻上一吻，令廣管局接獲多宗投訴，更有網友譏那一吻為「死亡之吻」，欣宜慘遭大肆攻擊之餘，吳卓羲也被取笑近一年。不過事件並未嚇窒一心殺入娛樂圈的欣宜，早前其父鄭少秋已踢爆欣宜將殺入樂壇。昨日記者問欣宜會否擔心加入娛圈後批評更多，她表示早有心理準備，又說：「我都知會有呢啲事，冇可能一百個人一百個都鍾意你，呢啲新聞就係一個package。」
不過欣宜短期內仍未能出道，她昨日說：「我聖誕節會返過加拿大開學，呢幾個月就留喺香港照顧媽咪，因為佢最近做咗個通膽管手術，佢有糖尿病又唔戒甜，血壓高又唔戒鹹，所以我要監管住佢。」
未能即時加入樂壇作戰，但欣宜留港期間應不乏幕前演出機會，她說：「呢樣就唔知呀，但係我一定會去跟劉老師學唱歌，其實好多時劉老師都會將佢啲新歌畀我試唱，我覺得自己好lucky，有一個咁好嘅老師。」除積極進修歌藝外，欣宜同時積極收身，她表示現時體重約140多磅，會繼續減肥，她說：「我覺得自己個身太厚，同埋仲有好多byebye肉，我日日都有去做機㗎。」

父親安慰
「只要做番自己就得」

慘成網民公敵的欣宜，曾遭不少網友將其舊照片及表演片段加以醜化，對此欣宜表現淡然，並稱現時採取不看政策，她說：「我第一次睇到呢啲網上片段，係三年前我媽咪生日嗰日，當時我唔想佢唔開心，所以就打電話同爸爸傾，爸爸話叫我唔使放喺心入面，只要自己冇做錯，做番自己就得，我係一個唔識造作嘅人。」
欣宜又透露現時已不再寫blog，因不想自己的私人照片再被傳媒刊登，她說：「之前我唔知寫blog係人都拎到我啲相，之後我試過唔開名唔整相都俾人知道係我，所以我決定以後寫日記。」
早前有雜誌拍得欣宜面上長滿暗瘡，並指她因激光美白而變成爛面，昨日所見，欣宜面上確有暗瘡印，但她否認曾接受激光美白。欣宜笑說：「我之前係有三粒暗瘡，不過就冇雜誌所講咁誇張，我𠵱家左邊面都有三粒暗瘡印㗎，我連facial都唔做，我青春先有青春痘啫，所以我唔會嬲。」
採訪：李珮洳
攝影：葉君海