頭痛慘過大病，個頭成日切切痛，搞到大腦幾乎死火，做嘢都冇心機，嚴重影響工作。雖然唔少人話頭痛，大家對頭痛究竟認識幾多呢？原來根據國際頭痛學會嘅詳細分類，頭痛可以分幾十種咁多，比較多人痛嘅係緊張性頭痛、偏頭痛同埋叢集性頭痛，仲有，感染同創傷都可以搞到個頭好痛。

要調整生活步伐

究竟香港有幾多人時時畀頭痛折磨？衞生防護中心曾經做過調查，有11.5%嘅受訪者話自己成日頭痛，年輕女士頭痛比率會高啲，唔好以為頭痛係大人嘅事，竟然有2.8%嘅小學生久唔久都會頭痛。
無論大人定細路，最多人係緊張性頭痛，好多人都知道緊張、焦慮、抑鬱、唔夠瞓、疲勞會搞到緊張性頭痛，但醫神唔講你唔知，原來肚餓、食咗味精、坐姿不良、女士經期前後嘅荷爾蒙改變，都會頭痛，有啲女人經前頭痛到要睇醫生。
食止痛藥係最常用去醫頭痛嘅方法，但長期依賴藥物始終唔好，其實仲有好多方法去醫頭痛，首先要搵機會短暫休息一吓，按摩吓額頭、頸同肩膊，如果係屋企，就可以浸個熱水浴，係辦公室就可以用冰袋敷面，再放鬆心情，痛楚可以慢慢減輕。
定期出現嘅緊張性頭痛其實係一個健康嘅警號，身體會透過頭痛，話你知你嘅生活已經嚴重失衡，壓力超出咗身體可以承受嘅範圍，最好快啲去調整下生活嘅步伐，至係解決頭痛嘅最有效方法。
blog主：醫神