高齡百歲嘅「六叔」邵逸夫考慮退休，但熱心捐款推動教育獎勵科研就唔會停，早幾年倡議設立嘅國際性獎項「邵逸夫獎」，分設「天文學」、「生命科學與醫學」，同埋「數學科學」三個獎項，目標係成為「東方諾貝爾」，表彰喺學術科研或應用獲得突破成果，以及對人類生活產生深遠影響嘅科學家，評審仲有一個原則，就係唔會考慮得獎科學家係乜嘢種族國籍或宗教信仰。
唔經唔覺邵逸夫獎已經辦到第四屆，評審會主席楊振寧教授聯同一班理事會理事噚日公佈今年得獎名單，六叔噚日冇現身記者會，由身任邵逸夫慈善信託基金同邵氏基金會主席嘅「六嬸」方逸華做代表。三個獎項由四位科學家獲獎。

研究理論天體物理學同行星科學嘅美國普林斯頓高等研究所自然科學院彼得．高里教授獲得天文學獎，研究G-蛋白質偶合接受體嘅美國霍華德．休斯研究所研究員羅伯特．尼科威教授就獲得生命科學及醫學獎；至於數學科學獎嘅得獎人就有兩位，分別係美國普林斯頓高等研究所嘅羅伯特．朗蘭茲教授同美國哈佛大學數學系嘅理察．泰勒教授，表揚兩位成功開展一個連結素數同對稱性嘅數學體系。得獎者各獲100萬美元獎金，今年9月11號頒獎。