韓國大熱綜藝節目《無限挑戰》去年因為其中一個主持盧洪哲發生醉駕事件而要退出節目，搞到《無限挑戰》由六人主持變成得五個人主持，不過《無限挑戰》下個月將迎來節目開播十周年紀念，所以製作組都特別搞搞新意思，今日喺官方twitter公佈將迎來第六位主持，仲歡迎粉絲畀意見。

由於《無限挑戰》一向有收視保證，所以唔少藝人都會想加入，網上亦都出現咗唔少藝人被提名，不過觀眾就似乎相當念舊，當中大部份都話想盧洪哲可以繼續留低，製作組方面就話佢哋會積極聽取觀眾嘅意見，又有所保留話就算盧洪哲再歸隊亦唔係冇可能嘅事，回應傳媒提問時亦只答：「無可奉告。」而現任幾位主持日前就拍咗預告片作招募新成員，佢哋仲好似啲間諜咁秘密地進行活動，非常搞笑。

至於，盧洪哲之前去咗歐洲度假散心，已經返到韓國嘅盧洪哲就被網民拍到喺韓國享受踩單車，網民仲偷拍到佢嘅新照兼放上網，唔少網民睇到後都大讚佢好可愛呢。