談到發哥的電影世界,他坦言訓練班導師鍾景輝對他日後演戲之路影響最深,他說:「最影響我係藝員訓練班導師鍾景輝,嗰陣對演技呢樣嘢認識係零,佢引發到我對戲劇喜愛,演戲細胞條筋俾佢挑起咗。」
發哥的經典作品有不少,而他心目中的經典則是哥普拉的《教父》,最喜歡自己的作品則是與梁朝偉演出的電視劇《北斗雙雄》,發哥解釋:「呢一部係我喺電視台十幾年唯一一部係開工當嬉戲嘅劇,之後嗰啲係受歡迎,但嗰時係完成工作而唔係享受工作,嗰陣《北斗》係返去耍樂,人人都似癲佬咁玩,好開心,嗰陣𡃁仔又冇負擔,𠵱家好多嘢要諗,票房、對手。」問他有否懷念八、九十年代的港片盛世?一向看得開的發哥坦言:「懷念?點會?時間過咗就冇咗,時間只會向前走,一切都係幻象,所以都唔會諗,你仲喺月球,人哋都去咗火星。」