娥特7.1上任後，因為一啲翻新工程，未有即時入住禮賓，但原來上月底已經悄悄遷居。呢位首位禮賓府女主人，7月底曾經被發現去買床單同枕頭，似乎都係為搬入新屋做準備。但相信大家更關注禮賓府係咪夠廁紙，好使呢位女特首唔使漏夜搭的士去便利店購置？至於第一先生林兆波，可能只係想要一片小小的地方，晾到佢嘅純情白襪仔。

雖則冇擺入伙酒，但娥特日前仲搵嚟有「林鄭2.0」稱號嘅特首辦常任秘書長丁葉燕薇陪同，邀請百幾個加入咗18區青年網絡嘅後生仔到府上傾偈。娥特喺Facebook透露，席間交流氣氛熱烈，大家都踴躍就「三業三政（學業、事業、置業；議政、論政、參政）」發言。

娥特發佈嘅片段中，話特區政府非常重視香港青年，指呢次係一個「議政論政」嘅機會，叫年輕人可以問佢問題或分享睇法，唔知有冇人問娥特點睇最近一班被判刑嘅年輕人？

娥特早前搞完呢個Housewarming後，今日就進行上任兩個月內第7次外訪，出發去緬甸訪問，出發前先喺特首辦同中國首席大法官、最高人民法院院長周強會面，會後更同周強見證律政司司長袁國強與最高人民法院副院長李少平簽署《關於加強最高人民法院與香港特別行政區政府律政司交流與合作紀要》，話相信雙方會進一步加強優化兩地司法同法律界交流合作喎。