繼上人網抽仙樂都水同涉嫌六四集會時喺阿夢岑寶兒面前自瀆後，「維園霆鋒」龍心（定係絕心）人氣幾何級數上升，唔知係真癲定假癲嘅佢，日日例行拎住佢部focus唔到嘅Sony上街拍片，睇吓拍唔拍到正嘢放上YouTube，俾班信眾喺電腦前自high頂癮。
前日龍心殺到去旺角，估唔到又有收穫。當日佢見到有皇氣，即時當街叫囂：「邊個係黑社會，全部同我『響朵』！」之後又話：「旺角我揸旗，doyouunderstand？」唔知係咪呢句辣㷫咗班MK友，突然有個自稱「牛佬」嘅大隻佬殺出，作狀自摸下體嚟問龍心：「係咪咁揸旗？」走嗰陣又向龍心舉中指，搞到俾龍心寸：「走住嚟X，冇X用！」

大嗌救命

牛佬喺人群前霸氣盡失，啖氣點吞得落？隔幾分鐘忍唔住返嚟尋仇，磨拳擦掌作勢要打龍心。就喺呢個時候，龍心大叫救命，咁啱面前有警察路過，就將牛佬拉埋一邊問話。龍心得勢不饒人，特登走埋警車前影牛佬近鏡，牛佬喺警察面前收晒火咁同龍心講：「走啦，我唔想搞大佢呀，走啦。」
龍心旺角大戰牛佬片段熱爆YouTube，點擊次數兩日超過10萬。牛佬慘變「淆佬」，仲要俾班高登仔恥笑兼起底，認真陰公。
話時話，龍心同牛佬好有淵源㗎，不過係漫畫《古惑仔》嘅著名作家牛佬，原來佢近期都畫過龍心，仲影射佢衝擊《城市論壇》，分別係龍心俾人打到豬頭咁囉！