安祖高美斯係邊位可能好多人都唔知，呢位16歲曼聯小將喺上季英超煞科戰上陣，成為英超歷史首位2000年打後出世嘅球員上陣。高美斯當然唔想喺英超只係留低呢個足跡，佢喺休季期間特登邀請咗位退役拳手操練，希望可以練好體能迎接新球季。

高美斯邀請嘅拳手來頭唔簡單，係前歐洲輕中量級拳王占美摩亞。摩亞喺佢自己社交網度話：「好高興可以同安祖高美斯練習，喺佢為新球季做準備有一個好開始。」