【愛上攀石】懸崖失手跌幾次 林德信爬兩個鐘上獅子山
林德信攀石獅子山新歌分享會
近來愛上咗攀石嘅林德信 (Alex)今日去到銅鑼灣HMV,出席佢嘅新歌分享會,正拍緊新戲嘅佢話,因電影角色係一名攀石運動員,所以最近就搵教練學攀石,早前更大膽嘗試爬獅子山:「總共爬咗兩個半鐘,中間有啲路段係完全垂直嘅懸崖,曾經失手跌過幾次,好彩有安全繩吊住,當時好驚但同自己講一定要冷靜,最後成功到山頂嘅心情真係好興奮。」
Alex話因為攀石關係,所以連身型都Fit咗,佢笑言:「應該都有40幾吋胸,我冇認真度過,仲可以震波㖭。」問到Alex胸圍咪仲勁過女友?佢笑笑口話:「係呀。」
講番今日 ,佢話今次新歌係早前約滿環球後同幾個朋友一齊做:「有三首英文、一首廣東同一首國語,連MV都拍埋,希望可以做啲令自己開心嘅嘢。」問到爸爸林子祥同女友有冇聽過?佢話:「爸爸有聽,仲睇埋個MV,佢話拍得好靚。」咁女友又有咩評語?佢話:「佢有聽,個個都話好聽,希望個個朋友都鍾意。」
林德信 (Alex)今日去到銅鑼灣HMV,出席佢嘅新歌分享會。(攝影:曹家誠)
正拍緊戲嘅佢話,因電影角色係一名攀石運動員,所以最近就搵教練教攀石。