亞洲海嘯風暴帶來大量死亡，寫稿之時，已知有五萬五千人死亡，而死亡人數肯定繼續上升，死亡最多嘅斯里蘭卡係一個窮國，根本無法應付咁大嘅災難，當地啲唔少外國遊客倖存者，話去醫院找尋失蹤兒女，偏偏一位兩歲瑞典男童在醫院內冇人認領，後來找到亦受傷的父親，母仍失蹤。一位七十歲斯里蘭卡長者哀嚎：「我咁長命愛嚟做乜，獨子死咗，兩個男孫死埋，點解海水唔捲走我而殺死我嘅兒孫。」真係聞者心酸，我哋香港人應該捐款幫助受海嘯影響嘅地方，但係捐畀邊度呢？捐畀聯合國救援組織又點捐法？左丁山在此呼籲，香港特區政府帶頭捐錢，設立專戶俾市民捐錢，等政府同聯合國聯絡，運用善款。

我哋香港好夠運，完全不受海嘯影響，甚至外遊旅客，亦安全回港。不過居安思危，下一次會唔會輪到我哋，譬如今年日本、台灣已發生過好幾次地震，好彩冇去到九級啫，影響不大，如果明年、後年，日本、台灣發生九級地震又如何？海嘯咪好容易席捲香港？想吓都驚到暈，究竟有無法子預防（如五號、八號、十號風球）㗎？
呢排睇好多外國電視與報章新聞，啲科學家重係辯論不休。一派話如果政府肯撥巨款，在海底設立地震預警儀器，可以幫助發放海嘯資料；一派認為九級地震海嘯，幾十年至有一次，機率甚低，唔值得花咁多錢，貧窮國家（如斯里蘭卡）更加冇可能撥巨資建設預警系統。正是公說公理，婆說婆理，左丁山呢啲科學盲，唔知信邊個好。既然唔識，只好聽天由命，聽日就係新年，但願○五年世界和平，無災無難，搵唔搵到錢都唔重要咯，平安是福。