【新增動新聞】
利物浦喺夏季轉會窗關閉之前以3,500萬鎊買入咗阿仙奴嘅阿歷士張伯倫，點知呢位英格蘭中場變咗做「黑腳」，加盟以來紅軍四場比賽都未贏過。

喺張伯倫加盟之前，利物浦今季各項賽事戰績係四勝一和未輸過，當中包括8月尾主場以4:0大炒阿仙奴，呢場比賽張伯倫都仲係槍手球員。當張伯倫轉會之後，紅軍第一場就畀曼城大炒5:0，跟住喺歐聯同英超先後賽和西維爾同般尼，到咗星期二作客李斯特城嘅英格蘭聯賽盃第3圈，張伯倫終於等到做正選，點知利物浦又輸0:2，唔少網民都認為呢位24歲球星係「黑腳」。嚟緊星期六利物浦就會喺英超再次往訪李城，唔知到時張伯倫仲有冇機會做正選呢？

紅軍買入張伯倫之後未贏過，咁邊個最開心呢？相信應該係賣咗佢嘅阿仙奴喇，因為自從賣咗張伯倫之後，阿仙奴戰績係兩勝一和未輸過㗎。