火箭喺周四晚，即係香港時間周五朝早作客快艇，喺第三節一度落後成19分，諗住可以提早放假啦，點知教練麥希（KevinMcHale）喺第四節做咗一個大膽而明智嘅決定－收起球隊基石夏登（JamesHarden）。

如果你淨係睇得分，可能都仲會覺得基石哥係贏波功臣，話晒佢攞咗全隊最高嘅23分，但係睇吓[+/-]嗰行，即係個別球員落場時球隊嘅得失分，夏登係-21分，即係如果只計佢落場嘅時間，火箭係落後快艇成21分。

夏登自信到話自己係球隊基石，第四節見到咁嘅情況，叫佢情何以堪呢？其實火箭可以喺第四節追返，冇咗夏登真係好大影響，點解？因為球隊可以有五個球員防守，搞到快艇呢一節攞得15分囉！當然亦唔少得鷹王J史密夫（JoshSmith）喺關鍵時刻嘅3分波啦。火箭大逆轉，逼快艇要去侯斯頓打Game7，有巴打話希望火箭入埋總決賽，等佢哋可以睇到鷹王倒戈一線鷹呀！