靚女會計師露比打電話嚟，居然問八字，左丁山大感愕然，問佢所為何事，現代女性無故問八字，必有所圖也。
左丁山雖然跟八卦邱學到千分之一皮毛，但好怕俾人問，因為無謂識少少就誤人前程啫。露比話：「你又話識少少嘅，咪問你囉，唔通我要去搵人算命咩。最近與男朋友頻頻鬧交，阿媽話我哋八字可能唔夾，無謂勉強喎，所以特登問你有冇咁嘅事！」

哎吔，寧教人打仔，莫教人分妻，千祈咪搞，講錯咗誤人姻緣，罪莫甚矣！露比之所以如此心急，原來重有一段故事，佢嘅好朋友珍妮拍拖已有好幾年，與男朋友各因職業前途，唔肯結婚住，現在珍妮已升為銀行經理，男朋友亦得到律師樓簽約，睇來兩人嘅前景都好穩定，於是決定短期內拉埋天窗。誰知橫生枝節，男朋友個媽咪話要攞珍妮八字，睇吓佢會唔會尅老公、尅老爺、尅奶奶喎，珍妮為之大怒，認為二十一世紀重講呢樣嘢，幾大都唔得，一於唔畀出生時辰（男朋友當然一早知道佢嘅生日），與未來奶奶紮晒馬，律師男友就夾在中間，左右做人難。珍妮就話：「我兩個結婚，關你阿媽乜事！你咁聽阿媽話，拜拜可也。」貌似強硬，其實同露比喊咗幾次。
露比情緒亦受影響，於是搵左丁山問計，左丁山就話未來奶奶分明故意為難，以夾八字為藉口而已，可能另有別情，珍妮應該繼續企硬，與未來奶奶談判。