以下係一宗有關剩女騙案嘅警訊，希望大家留意一位專呃政壇剩女嘅冇口齒政客。
話說隻狼振英上周六去葵青區出巡做騷，當區區議員麥美娟就大嘆，女性工時好鬼長，好難搵個伴，搞到香港剩女多多，佢都係其中一員。
振英哥聽完，即時化身剩女救星"狼tino"，45度角拍心口承諾，要喺24小時內提供5個男士嘅履歷同相片，畀麥美娟揀吓。
但截至噚日，事隔逾48小時，說好了的男士cv仲未到麥美娟手喎，由此證明，隻狼真係冇口齒。麥剩女就話冇所謂，事關就算有對象，都未必有時間拍拖啦，叫振英哥搞好標準工時仲實際。但你估振英哥會唔會做得到呢？