亞視重新無耐，噚日開台僅95日時，卻突然再傳出大地震，包括亞視CEO吳雨、營運總監區偉林嚟緊將轉做顧問，吳雨、區偉林同曾醒明三位亞視高層即開茶聚解畫，強調唔係人事變動，及否認閂水喉。（新聞連結： https://bit.ly/2FHnjaQ ）

至於由樂瞳、蘇珊與李志剛擔任主持的節目亞視《今晚見》今晚繼續錄影，由戚美珍與顏聯武擔任嘉賓，眾人冇講到亞視又傳地震。戚美珍於節目中獻唱，佢笑謂經常被老公苗僑偉指係「天涯歌女」：「嗰時我入行就係拍劇同做EYT（《歡樂今宵》），吳雨知我鍾意唱歌，就安排我喺EYT唱歌，由好難聽變得有啲眉目。」

戚美珍表示之後有跟老師學唱歌：「曾經諗過喺樂壇發展，不過當時有徐小鳳同梅艷芳嗰啲，繼續學都係唔想登台失禮。」戚美珍又笑指老公好醒：「飲到咁上下就上台唱，咁就無人迫佢飲酒。」佢謂自己仲有戲癮，等候適合嘅角色，佢大讚亞視有意拍劇是好事，畀業界有工開。而樂瞳表示好想邀請偶像鄭秀文做嘉賓：「鍾意咗佢好耐，係咪可以試下inbox佢呢？」另外，問到緋聞男友羅慎安早前被指欠租，佢話：「朋友咋，好似解決咗，唔關我事，我同屋企人住㗎。」

精選娛聞，喺晒《娛果》
http://fb.com/appledailyent