鬼塚03年結束所有時裝生意﹐咁佢做乜嘢打發時間呢？係玩。

唔係，係追夢至啱。

結束所有生意，鬼塚正式開始追佢嘅夢：「好多嘢我一一實現，非常開心。我好鍾意釣魚，考咗個領隊牌，喺旅遊業議會入面。一間幾蠢嘅旅行社又聽我講，收35人一架車。俾我小費，我就俾番佢哋。帶完一團又一團，呢個幾開心，玩得來又一個夢，我玩完十幾團之後，將個證撕爛佢，又唔玩。

【玩高卡車？老婆拍枱嗌離婚】
「之後我又玩電單車喇！我覺得一個人，男人，要玩啲有動感嘅嘢，買咗架哈利，玩呢啲嘅人好鬼型，但係我手又好鬼短，我又好鬼鍾意，咪改短佢。隻手係短，但係我覺得幾有型，最緊要係自己，所以我自信心幾爆棚。」

「星期日去揸電單車，夏天就出海，所以人如果冇朋友，係會悶死。我好多朋友。如果我出街冇撞到一個朋友，咁嗰日我就係冇出街，時間好易過，o依家又玩高卡，要落大場，但係我老婆拍枱，佢就話呢次唔可以支持我，如果我要去澳門玩賽車，就一定要同我離婚，『係咁先！』幾勁呀佢，型到佢呀！

「喂！講數我就犀利啫，你咁樣對我，拍枱離婚，以後我提都唔敢，提都唔敢提，冇辦法，我愛佢，佢唔係靚呀！但係佢嬌俏，嗰度衰格，冇理由佢鍾意我，o依家佢60歲都好靚。」

【醉才是永恆：你要凌架佢】
為咗健康，鬼塚可以減肥，但係佢冇諗過戒酒，因為喺佢嘅字典中，仲有一句金句：醉才是永恆。

「我非常鍾意杯中之物，令我朋友和思維之間放肆，酒令你變性，你要凌架佢，呢樣係我每日都要講『醉才是永恆』，點都要兩三個鐘頭做運動。酒對肝唔好，我唔係提倡大家飲，但係會令個氣氛好好。」

訪問其間，鬼塚兩杯落肚，又話要同班後生講人生道理：「人生，你今日搵我去講，真係將我幾十年經驗同後生一輩講，機會你一定有！你會唔會捉住佢？愛錫佢？你唔愛錫佢，包括你身邊嘅女朋友、你太太，所有嘅嘢，你一定要愛佢，如果唔愛佢，佢會同你拜拜。

「呢個情況唔會發生我身上，我有一個太太，一個仔，一個女，女快30歲，仔27歲，我永遠都係開心，感謝主！」