(新增內容)謝婷婷噚晚(23號)同靚靚袁詠儀、薛芷倫及諸葛紫岐等喺中環四季酒店出席護膚活動，婷婷提到重遇靚靚開心：「因為之前一齊喺上海拍真人騷，佢打網球，覺得好搞笑，好似好叻。」上年12月緋聞男友「鷹眼」謝洛美維納（Jeremy Renner）嚟香港同婷婷兜風（新聞連結： http://bit.ly/2tWSkCe ），問到「鷹眼」運動如何，她表示：「我唔知，我哋無打過，知道佢其他運動好叻，好身手敏捷。」

今晚見到婷婷，記者問到佢同「鷹眼」拍拖生活，佢就無否認戀情：「我喺L.A.嗰邊專心返學，有時間見面，喺屋企睇吓戲，食吓飯，佢都專心佢音樂，會唱歌、彈琴、彈結他，佢練緊嗰時我會專心聽。」二人分隔兩地，會否夾時間見，她表示：「我冇提議，自己工作為先，都唔知佢支唔支持，有時佢覺得我只管工作唔理佢，但自己搏殺期，唔想做嘢分心，隔咁遠都係好，感覺佢想有個人喺身邊想穩定。」

其實46歲嘅「鷹眼」喺荷李活先後同多名女星拍過拖、與查理絲泰朗（Charlize Theron）嘅緋聞一度傳得熱烘烘、仲同女星Sonni Pacheco結埋婚生埋個女，不過婚姻只維持咗短短一年。咁啱得咁橋，有外國惡搞網站最近以「Jeremy Renner Engaged？」（謝洛美維拿訂婚？）為題寫咗篇「報道」，內容寫到「鷹眼」拖住女朋友買訂婚戒指為，仲有模有樣連「觀眾」都訪問埋，鬼咁專業。

而《蘋果》見到呢篇惡搞報道就send咗俾婷婷，不過佢睇完就冇回覆，咁究竟「鷹眼」同女朋友係咪真係去咗買訂婚戒指，真係冇人知喇。