現年24歲的賭王三房千金何超蓮，自與台灣藝人吳克羣甩拖後，桃花運旺盛，與霍啟山兩度蜜會斷正。昨日三太陳婉珍、二房女兒何超蕸、王賢誌和馬清揚等，出席於上環舉行的東華三院新春團拜，三太被追問囡囡超蓮的感情狀況時說：「佢暫時未有拖拍，佢咁後生，慢慢揀，識吓朋友先。」
雖然否認乖女拍拖，但對超蓮緋聞男友霍啟山就有讚無彈，問三太可有見過啟山？她說：「見過一次，喺廣東政協開會，離遠見到，佢OK㗎！佢幫我影相，仲send番畀我，幾有心。」再問她是否都覺得啟山不錯？她更即時開綠燈，連答兩次：「係呀，係呀。」證明啟山行外母政策相當有效。

玩貓恨有孫

昨日是元宵佳節，問三太可會跟賭王慶祝？她笑說：「今日唔係我，元宵冇乜特別慶祝。」她又表示剛過去的農曆新年留港玩貓，她說：「𠵱家有三隻貓，好得意，我好鍾意，好似有小朋友咁，多啲聲氣。」
另外，即將卸任主席的超蕸，坦言已經開始不捨得，又指今年會專注公事、運動及休息，她說：「要注意健康，嚟緊想行山同踩單車，平時都有同爸爸打吓波。」問她有否陪賭王打麻雀？她笑指自己只是大後備，負責戥戥戥腳。
採訪、攝影：羅慧敏