中電新能源（735）係國策受惠股，股東又粒粒星，遲早發光。中電新能源主席係祖國電后李小琳，主要股東包括國資委旗下「長江三峽集團」、「中國電力新能源」，及中國海洋石油總公司，全部勁重磅。集團主打環保發電業務，食住國策，喺咁強勁股東背景之下，唔難保成為第二隻光國（257），市值及業務蒸蒸日上（光國09年得0.50元，家陣貼近4蚊）。啱啱喺上個月尾，中電新能源股東中國電力（2380），以每股0.65元兌換集團CB，中電新能源家陣得0.34元，大股東以高溢價兌換，信心表露無遺。呢轉一於長、短打，一注揸實博業務壯大，一轉博上番CB換股價0.65元，現價幾乎翻一番，但P/B仲喺一倍之下。

百仕達火燒冷灶

百仕達（1168）手頭現金高達41億銀，借貸得2.65億銀咁大把，淨現金高達38.7億銀，相當於每股1.10元，百仕達家陣幾銀？係0.59元，每股淨現金遠遠高過現價。再講，百仕達係三年低殘位，NAV折讓高達70%，內房股當中，集團嘅折讓好吸引。趁呢轉內房郁郁吓，冷灶煲一煲，博百仕達升20%到0.71元，未有耐上到NAV。錢雋