回歸20年，以「來回地獄又折返人間」形容香港零售市道最貼切不過。經歷金融風暴、樓市大跌、消費急挫，到「核彈級」沙士來襲令零售直插谷底，然後內地2003年起放寬旅客來港，戲劇性令2013年全年零售額，爆升至歷史新高4,944.51億元。有受惠於零售狂潮的零售商不諱言，香港零售市道風光不再，大家又要重新上路。

有83年歷史的珠寶首飾零售商周生生（116），其大中華區營運總經理劉克斌指，回歸20年，最印象深刻是2003年沙士，坦言是「最困難係嗰個年代，但好好彩，後來有自由行開放嘅喜訊，對我哋（零售）嚟講有好大幫助，多咗好多內地客」。他指，受惠內地旅客對黃金及奢侈品需求龐大，生意額至少按年升40%，集團加快開店步伐，「總之有地方就爭取營業面積」。

珠寶業界嘆風光不再

不過，高峯期過後，珠寶業2014年開始步入調整期，劉慨嘆風光不再，「做生意幾時都有起有跌，好多環境、人為因素都唔可以預計」，故近年開始減少旅遊區開店，改為於元朗及沙田等民生區開分店，吸納剛性需求及自用消費者市場。

同樣受惠自由行的六福（590），其主席黃偉常表示，1998至2003年接連遇上金融風暴及沙士，是最難捱的日子。他指六福1997、香港回歸年上市，隨即遇上金融風暴，股價跟生意同步急跌，幸好2003年後自由行旅客湧港，帶挈集團不斷在遊客區擴充；至近年一周一行政策再次令行業面臨險境。

對於當前情況，黃偉常處之泰然稱，「（近幾年）梗係冇咁好啦，但生意梗有循環，平靜少少都好嘅，鞏固下產品組合、款式」。他多番強調「內地人始終係主要客源」，未來10年，個人仍堅持「睇好中國市場」。

長期被內地旅客視為必到景點的化妝品零售龍頭莎莎（178），亦剛好在回歸年上市，主席郭少明坦言，慶幸能在1997年金融風暴爆發前上市，指當時「我哋都有一間舖頭喺旅遊區，生意跌咗好多」，上市後令公司有足夠資金，可穩住軍心兼加快發展民生區份。

賣口罩曾佔生意額20%

2003年沙士，他亦以港人靈活變通特色應對，「唔係世界末日嚟！嗰時全香港人都戴口罩，你見到人同人笑會覺得你好怪」，但後來有個熟客仔打嚟『郭生、郭生，我買唔到口罩』」，令他驚覺此刻「客人唔係需要化妝品，擦唇膏，係需要戴口罩、清潔用品」，馬上安排採購同事全球搶口罩，口罩銷售一度佔生意額達20%，「頂住」業績。

直至今日自由行旅客大減，郭少明坦言「調整係正常嘅，遊客不停屢創高峯，但高峯永遠都有下調㗎」，無論是莎莎或是香港零售業，均需要靠自身調節適應新環境。

建銀國際消費行業研究部董事陳兆昌指，自由行開放初期，確實吸引到不少內地人來港「土豪式」消費，帶動本港零售市場急速增長；然而，近年旅客消費喜好及習慣出現變化，凸顯本港旅遊業客源單一化問題，「自由行開始普及，有錢嗰啲選擇去其他地方，深圳跨境嚟香港嗰啲，咪買下日用品」。

他預料，未來本港零售市場會平穩發展，惟不會回復到2010年時期的高增長，相信日後香港「唔會太迎合某類旅客……好多唔同類型舖頭又會出現」。

記者：范穎琛 方楚茵 江靖然

攝影：江俊豪 李潤芳 朱家駿

掌握財經生活資訊，即Like「蘋果ATM」fb專頁啦！
http://fb.com/appledailyatm