安志杰（Andy）同JessicaC.早前喺香港出席活動時，暗示JC懷孕不足3個月，按中國傳統習俗二人未有親口承認有喜，日前兩人赴馬爾代夫拍拖一週年紀念之旅，現年39歲安志杰成功求婚，即將迎娶27歲JC。

今早一對情侶甜蜜回港現身機場，兩人黑超遮蓋倦容，但恩愛之情洋溢，四度親咀，JC不斷騷手上近兩卡求婚鑽戒，安志杰又輕撫JC陀b五個月大肚皮。

安志杰助手帶同佢愛犬到機場接機團聚，佢透露花咗一個多月籌備求婚，係咪因為有咗bb先求婚?安志杰話：「之前活動上唔講係想畀驚喜佢，希望求婚後再講呢個消息。」JC講：「好驚喜，在拍拖週年紀念上，好浪漫環境求婚。」JC終承認腹中塊肉近五個月，性別未知道，二人仔女都鍾意，JC最初知道懷孕時有啲緊張，後來適應咗，依家身體狀況ok，佢繼續話：「好驚喜同興奮，因為第一次懷孕，又收到求婚，知道有左bb後我都冇畀過壓力對方。」至於係咪有咗bb先咁快結婚，安志杰話：「唔係，之前有傾過呢個話題，但我飲醉酒，佢以為我講大話。」

JC暫時未知婚禮安排，因為要再計劃，預計會到美國待產，之後再返香港，安志杰會陪住未婚妻生產，香港擺酒要等BB出世後。手上鑽戒安志杰話近兩卡，JC甜蜜表示：「當時喺沙灘睇寄居蟹，睇睇下見到有戒指，開心到唔知講咩。」而安志杰舊愛謝婷婷有送上祝福，安志杰話冇留意但多謝佢。JC一臉幸福稱：「以前我叫佢男友，依家係未婚夫。」雙方家長都知道件喜事好開心，JC完成埋手頭工作就進入待產期，會努力嘗試自然分娩。