剛周日（2日）賽後，戰友來電喪鬧，事緣他買了六環彩，六寶獎只斷了臨場由賴維銘換潘頓的「恆駿寶駒」，最嬲係原本呢隻馬都係佢六環彩射程範圍，但最終在本錢有限之下，因為唔信賴仔而刪走了。

過往馬會臨場換人，曾向外界表示會有換回同級騎師這個準則，看看今次「恆駿寶駒」由賴仔換上潘頓，雖然大家都是沒有磅減的大師傅，不是說賴維銘唔好，但是否與潘頓同級，大家應心中有數！

再看該場有空做替工的騎師，除了據悉曾推莊的何澤堯外，還有利敬國、李寶利等與賴維銘級數較接近騎師，是否意味現在沒有「同等替換」這回事？買股票見勢色唔對還可跳船，但賭馬買了就舉手不回，馬會是否也要保障這類非「恆駿寶駒」的投注馬迷？

提到級數不同，周三（5日）谷草夜賽，第三場四班1200米，「英之友」前仗跑三班田草1200米極強組，面對「勁無比」及「艮志騰雲」等同班一線馬，全程外遊勁蝕位亦所負不遠。

到了上仗降班再跑同程，表面看對手滑弱，實際同組的「快樂旅遊」及「清福」等最近非冠即亞。而「英之友」放至最後100米才轉弱跑第五，今次轉跑谷草1200米，對手實力與對上兩次弱了一大截，「英之友」終可佔得「不同級」優勢，可拼出頭來。

至於第四場四班1000米，「霽月高風」四仗前配韋達贏谷草1000米，奈何之後三戰俱遇不利形勢，今勻一檔兼抽到莫雅執韁，應該會有唔同演出。