台北市總統府廣場喺三二○總統選舉之後，有十萬人集會，堅持咗一排之後，市警察出場，在場幾千群眾十分合作，冇流血、冇暴力事件出現。到咗四月四日晚，幾百名國親支持者聚集在相近地點，就俾警察驅趕、追逐，與第一次嘅場面完全唔同，但係就好似香港四月一日晚特區政府總部嘅情況，唔通陳水扁暗中向董建華偷橋，對示威群眾唔好客氣？

馬英九出嚟說明，我哋先知道第一次清場，係由台北市政府主動指揮台北市警察，國民黨市長自然對擁護國親聯盟嘅群眾十分客氣；第二次就係行政院長游錫堃下令內政部，繞過台北市政府，調動行政院警政署指揮台北市警察去執行嘅，故此警察如狼似虎。警察基本上只係執行機器，聽從命令嘅機械人，上頭話點就點，鬧佢哋都冇用，鬧發號施令嗰位最重要，台灣就係陳水扁游錫堃下命令嘅，香港特區係邊個？李明逵不過係台北市警察而已，上頭叫佢柔性（如第一次台北警察），佢就會柔性，上頭話要硬（如第二次四月四日台北市警察），佢就不得不硬！
大學生、學聯會現在要做嘅，唔係發動更多示威，而係要熱心投入「選民登記」，現在特區政府側側膊，掛住猛咁宣傳基本法（強調一國方面），對選民登記就懶理，唔熱心宣傳，直情係唔想有太多人參加九月立會選舉。大學生應該周圍鼓吹選民登記，九月就拉親友去投票，一於votethemout，them係邊啲人？心照啦！