昨午A加3欄大利貼欄前置馬，「金瀛」、「萬事盛」、「辣得醒」同「足智多謀」全部用呢種跑法勝出或入Q。其中第六場後備補出嘅「名列前茅」田泰安騎，沿途貼欄咬住放頭馬「足智多謀」一步不蝕，好衰唔衰後駒鞍上人呂卓賢拉士打左手鞭，座騎輕輕挨入，就咁一度關閂咗「名列前茅」去路，要到最後一百米左右至可以移出望空，可惜為時已晚，輸短馬頭位得第二，未勝馬繼續唔出頭，第五次跑第二。賽後田泰安抗議「足智多謀」，馬會裁定無效，賽果不變，阿田則唔經唔覺已成個月冇贏馬，遲啲仲要停賽三日，都咪話唔傷！