鄧紫棋（G.E.M.）早排周圍辣火頭，除咗不滿商台叱咤機制而杯葛頒獎禮外，又畀前輩甄妮指佢冇禮貌，搞到是非纏身。最「型」仲係，佢日前竟然又出席專益自己人嘅《勁歌》總選，仲當眾回敬一眾「前輩」話依家香港有好多不公、歧視、大蝦細……寸到應。

家陣嘅G.E.M.真係好紅，四月再踏紅館開騷，今次開三場。之前G.E.M.已經拍好演唱會海報，不過最特別嘅係，今次個唱票價種類，最貴嘅VIP位，竟然要成$1,280一張。拿，睇番佢個票價list，由$280、$380、$580到$1,280。

周杰倫2010年喺紅館開騷，最貴開到$880，已經被指高張學友、劉德華一眾天王；葉德嫻今年3月開騷，最貴都只係$780。07年張學友開騷，天王級數啦，開價$1180，仲係睇騷連boxset。

至於話G.E.M.冇家教嘅甄妮，二月開騷，最貴都係$680，仲「做足宣傳」，到依家都未賣晒飛。咦，有網民就話，今次唔係「大蝦細」，而係G.E.M.跑贏甄妮……個唱票價。賣成點，都未知。

亦有唔少網民議論紛紛，質疑G.E.M.憑乜嘢可以賣到1280元一張飛？係咪可以坐在台上睇？另外，佢個演唱會名叫X.X.X.Live，亦畀網民笑問係咪代表有Porn（色情）嘢睇喎﹗