報名參選港島後冇出席過任何選舉論壇嘅前立法會議員詹培忠，就連選舉日都唔會現身。八方問過佢點解咁神秘？原來都係因為健康問題，金勞詹話：「而家可以普通咁行得，但未正常哂，如果有人撞一撞，仆喺度，就好煩」，所以會交由一直替佢宣傳嘅四部車隊代遊港島區拉票。

原來佢嘅車隊好有趣，車上播放佢嘅競選宣言；金勞詹都話車隊好「搶鏡」，透露工作人員早前派發印有佢肖像嘅宣傳扇，都派出成23萬把喎，選舉Facebook專頁仲有近40萬人次睇過;，可見唔少選民關心佢嘅選情。佢自稱係「大冷門」，重申不認同泛民拉布、亦反對建制派通過市民唔接受嘅法例，「如果覺兩方面都唔理想，咪考慮選我囉」。

民調一直顯示佢只有兩個百分點支持，金勞詹就話唔信，認為自己係繼自由黨田北俊後商界參加直選嘅第二人(佢話同區對手王維基係傳媒人、唔係商界喎)，所以至少應有四個百分點支持，「隨時爆大冷門都話唔埋」。

同區參選名單詳見此網頁：
http://bit.ly/2aDHmxj