港交所（388）該當何罪？美股星期三晚因為法國風暴，又冧咗差唔多半成，噚日港股裂口低開464點，揸住滙控（005）、國泰（293）同港交所好倉、焗住坐過夜嘅炒友，真係喊得一句句。聽輪商講，話3隻藍籌相關牛證同Call輪，都輸咗散戶8位數字。
有炒開期貨嘅老手同唐牛講，早幾日大冧市引發嘅期貨斬倉潮，始作俑者其實都係港交所，「市靜嘅時候想做多啲生意，交易所就調低按金引大家入場，到個市一波動，就即刻話要做好風險管理，狂加按金，冇財力嘅散戶咪焗住斬倉囉。風險管理？咪即係俾晒啲風險我哋囉。」佢仲話，星期二港股開市跌千幾點，期權莊家完全唔肯開價，之後就算開番，個價都擘到冇雷公咁遠，想平倉都落唔到手，咁嘅情況，交易所冇理由唔主持公道。
唐牛份人比較樂觀，希望做慣獨市生意嘅交易所會做好本份，加強軟件同硬件配套，唔好俾以上嘅慘劇再發生，咁就功德無量嘞。
唐牛