景黛音1979年無綫第8期藝員訓練班畢業，同期同學有湯鎮業、廖啟智、黃造時等等，入行短短7年，做過《歡樂今宵》，又拍過《上海灘》、《天龍八部》、《香江花月夜》、《鹿鼎記》、《雪山飛狐》等經典劇集，尤其古裝最嬌俏可人。可惜86年拍完萬梓良主演嘅《陸小鳳之鳳舞九天》後，景黛音退出娛樂圈，神隱32年，直至今個月先至復出為ViuTV拍劇。

雖然景黛音做電視出身，但佢幾十年唔單止都冇追港劇或者睇香港嘅電視，就連自己作品，都冇興趣睇。

【受發哥恩惠：《上海灘》畀我企喺佢隔籬】
景黛音日前接受《蘋果》獨家專訪時話：「我完全唔睇自己嘅嘢，唔鍾意睇自己嘅嘢，一啲都唔鍾意睇，甚至乎人哋話買咗CD送畀我（當年出過嘅唱片），我話唔使送畀我，我唔會聽，唔知點解，我係咁樣。使乜回憶啫？你只要活在當下吖嘛，最緊要而家開心，你諗以前、諗將來都冇用㗎。」

雖然唔鍾意想當年，但問到當年拍劇冇乜難忘回憶，景黛音一諗就諗起周潤發。

「發仔好深印象，因為我第一個劇《上海灘》，我做佢老婆，嗰時好似訓練班未畢業。我好鍾意佢，佢係一個好照顧新人嘅人，嗰時講真吖，邊個識我哋啫！成套戲咁大卡士，我最記得一樣嘢，當日記者招待會，我哋梗係企晒後邊㗎啦，主角企前邊，佢就好nice咁話：『呢個係我老婆。』畀我企喺佢隔籬，佢呢樣嘢好好，好值得人學習，唔應該覺得自己巨星好巴閉，我好欣賞佢呢方面。」

【拍通宵瞓梳化：趙雅芝攞披風幫我冚】
除咗發哥，景黛音要特別多謝當年喺《上海灘》合作嘅趙雅芝。「我又好鍾意佢，佢又係好nice，係個好好心地嘅人，好記得嗰時我哋拍通宵，瞓喺梳化度，我真係好記得好記得，佢攞件披風幫我冚，我諗佢或者唔記得啦，所以我話對我好嘅人我樣樣記得，我又唔係一個特別角色。」

景黛音喺梅艷芳主演嘅《香江花月夜》飾演小杜鵑，同蔣麗萍一樣係第二女主角，佢同阿梅，原來私底下係好朋友。「佢係一個絕頂好人，我同一齊去過日本㖭，佢好鍾意一大班朋友。」

【拒與圈中人聯絡：你對我唔好，我會好記得】
離開娛樂圈幾十年，景黛音鮮有同圈中人聯絡，因為覺得大家已經冇同共話題。「我唔係唔當佢哋係朋友。講真，我覺得你係我朋友，你一世都係我朋友，唔關乎係咪飲茶食飯見面。喺我心目中，我嗰份感情係喺度，我個人就係咁，唔會因為一餐飯一杯茶，你對我好我一定好記得，你對我唔好，我亦都會好記得，但我唔會有任何嘅行動。」

「我個人係咁樣，好分明，自己唔係呢個圈，大家講唔到工作上嘅嘢，唯有講人，我又唔鍾意呢啲嘢。我鍾意好簡單，唔好咁複雜，亦都唔想有時講一句嘢就畀人諗到話乜嘢，我完全冇咁嘅心，我亦都唔會諗人哋點諗，我自己鍾意講乜嘢就乜嘢、做乜嘢就做乜嘢，點先可以咁樣呢？唯有自己過自己鍾意嘅生活。」

採訪：戴彩煥
攝影：林德雄
攝錄：葉君海、沈健程
場地：MAGIC3

精選娛聞，喺晒《娛果》
http://fb.com/appledailyent