帶領水晶宮開季四連敗兼冇入球嘅法蘭迪保亞，喺周一終於俾人炒咗。但係佢隨時可能仲笑得出，因為水晶宮炒佢，畀咗200萬鎊（約2,000萬港元）嘅賠償金。有咗呢筆錢，相信迪保亞可以唞返陣先再搵工。

睇返之前嘅報道，法蘭迪保亞最初同水晶宮簽咗三年約，份約總值600萬英鎊。法蘭迪保亞依家只係返咗77日工，既然大家冇乜感情，唔使講心就自然講金，3年約麻煩賠到足，咁就幾乎淨收2,000萬港紙，簡直羨慕死香港啲打工仔！

其實迪保亞攞到嘅賠償唔算多。睇返曼聯之前炒雲高爾嗰陣，佢地已經賠咗540萬鎊俾佢（約5,400萬港元）；摩連奴喺15年俾車仔炒嗰時，亦都收左1,000萬鎊嘅賠償（約1億港元）。所以話喺英超做領隊，被炒話唔定係好事。