衰家食尾糊雖然成日有，但由雷神呢部贏馬機器去演繹卻不常見。這晚（31日）前七場雷神莫雷拉輸晒，最叻頭場「大步走」跑第二，直至最尾第八場三班一哩，佢騎蔡約翰旗下「紅運精彩」才破蛋建功，單Win及組合獨贏A2分別派76及26元。

「紅運精彩」今場均速前置跑主動，於雷神胯下自造步速放返贏1馬位，佢食尾糊錄得個人整晚唯一頭馬，兼且全晚得1冠1亞2季，有26分後來居上勝出騎師王，蔡約翰則連續贏到第四個賽日，至於「紅運精彩」亦告敲響今季及本身沙田賽事勝鼓。

五歲愛爾蘭自購馬「紅運精彩」，之前只曾一捷於谷草，田草及泥地都未威過，呢次由雷神打破沙田盲門，亦幫馬主夏佳理收復失地，事關剛周日（28日）田草夏佳理有「紅運爵士」及「紅運發財」分別由雷神出擊跑第二及第四。

第八場二至四名分別為「金太陽」、「摩高一丈」及大熱門「皇者勝利」，四重彩派6,818元。其中「摩高一丈」是「大劉」劉鑾雄舊愛呂麗君名下馬，直路中段追到第二位，去勢甚勁看似贏得，點知臨門兩步轉弱衰收尾，不但贏唔到而且失落亞席，只跑第三。