現年40歲嘅日本天后安室奈美惠將於9月16日、即其出道26周年紀念日引退，其告別巡演上月已經開鑼，本月30及31日就會唱到香港紅館，而深圳就會係亞洲場次首站，今日起一連兩晚假深圳灣體育中心開騷，整個舞台及設備分別用空運及船運到大陸，共超過30個貨櫃，諗真大陣仗。

安室最後巡唱會到日本五大巨蛋演出，總共吸引80萬觀眾入場，打破日本個人歌手紀錄，安室大前日已低調飛到廣州再前往深圳作好準備，今之又係其低調作風，但仍有大陸粉絲發現偶像行蹤，拍下全身黑色嘅安室偕同行工作人員到達當地，由於有人拍下場內搭建舞台嘅場面，更偷拍埋安室綵排情況，照片及片段已在微博及微信流出，日方發現後大為緊張，安室深圳騷嘅官方微博隨即發文呼籲發佈者盡快刪除偷拍照，日方更警告若果綵排視頻洩漏情況嚴重，有機會中止兩場深圳演唱會。

安室引退在即，中國粉絲已準備多個花牌放在場館內，更準備兩張寫上「25年來謝謝你」、「要幸福喔」嘅橫額，到時會俾全場觀眾在橫幅寫下祝願。到開騷時，前排觀眾會舉起橫幅展示俾安室睇，最後會送到安室嘅團隊手上。同時，場內每個座位到時將都放有一枝黃色玫瑰花，望到時全場舉起玫瑰令安室有個美好回憶。

更多娛聞，喺晒《娛果》
http://fb.com/appledailyent