【本報訊】擁有雙碩士學位的林燕妮，美貌與智慧並重，經常出入ball場，打扮性感迷人，艷光四射，被封為第一代ball后。林燕妮愛穿名牌，曾豪擲百多萬買紫貂皮草而面不改容。
鄧達智形容林燕妮的人生哲學是「點都要靚」，他說：「佢好怕人哋覺得佢年紀大，佢同霑叔（黃霑）分手後，有段時間佢成日約我去ball，但有次去加州大學同學會嘅party，有同學指住我問佢（林燕妮）『your son?』，嗰次之後佢就冇再約我，佢嬲到呢！」

劉培基：活在童話

著名時裝及形象設計師劉培基跟林燕妮相交多年，指她的一生都活在童話世界內，性格愛恨分明，兩人緣於一支煙。
他說：「佢食煙食得好犀利，好佩服我戒得成煙。我第一次識佢就係煙仔，當年我喺英國讀完書返嚟，佢經朋友介紹嚟我度買衫，問有冇煙仔？我話喺枱度，叫佢自己攞。後嚟佢同人講，未見過咁嘅人，覺得我好特別。」
至於同樣被封為ball后的薛芷倫表示：「我同林燕妮姐姐已經認識咗好多年，中學的時候好鍾意睇佢寫嘅小說及散文，佢永遠都係一個好有品味同女人味嘅女人，佢對愛情同人生都有獨特嘅見解，後來我成日都會出入ball場，同佢都會有見面聚會，大家不時都會撞衫，會傾下扮靚、人生、愛情。」
■記者余燕儀、林妙萍