年屆71歲的葉德嫻（Deanie），仍不言休，接受挑戰首踏台板演舞台劇《親親麗南》，她自言在戲中是個衰媽媽。現實中，她既是母親，也是女兒，Deanie姐坦言在父母心目中，她是個「乞佢哋憎」的女兒，更自爆說︰「我自己都有兩個阿媽。」

一向關心社會的Deanie姐，最近參與銀髮族的遊行，還明言撐年輕人︰「你哋冇做錯。」難得Deanie姐分享她年輕時，與父母之間的矛盾，她說︰「佢哋講得唔啱我會糾正佢，我細個對住爸爸媽媽，聽埋啲歪理都要點頭，好谷氣、好痛苦，你話我唔孝順都冇問題。」說起昔日成長往事，Deanie姐不禁自爆︰「我有兩個媽媽，我爸爸住喺我生母度，我就同大媽媽住，每日爸爸返嚟探吓大媽，佢一入屋就掛住玩貓，我咪行咗去，佢玩完一輪，會向大媽投訴我話︰『點解德嫻唔同我講早晨。』咁點解佢唔同我講早晨呢？」

Deanie姐認為那時的女人出嫁從夫，故對老公言聽計從，不敢反抗。自小很有主見的Deanie姐，再遇到爸爸等她叫早晨時，她依然故我，「爸爸審我時，問我點解唔叫早晨，我話你又唔叫我早晨。後來佢用尺打我，我伸手畀佢打，佢喊住話未打過細路哥，尤其打啲女，我唔理佢走開咗。到而家問我，我都係話佢唔啱，佢以為大人就大晒。」在大人眼中，Deanie姐是個不聽話、反叛的女兒，可是Deanie姐自小生活在西方文化濃厚的小區，耳濡目染，「我細個住嗰區一半都係鬼佬，我見人哋媽媽會同細路仔講good morning，我爸爸真係老土。」Deanie姐說。

問到Deanie姐可是一個開明的媽媽？她認為對下一代要因材施教，她說︰「我好開明，同仔女溝通我用好open嘅方式，但接唔接受又係另一回事，有咩事我會攤出嚟講，唔會擺喺心入面。我唔知自己有冇教錯啲細路哥，可能我都有啲做錯，所以導致佢哋有啲唔好嘅嘢。」

撰文︰羅婉玲
攝影、攝錄︰葉君海
化妝︰Stephen Lau@Stephenmakeup（葉德嫻）、Vinci@vinciwinki（蘇玉華）
髮型︰Seiko Sin@Hair Culture（葉德嫻）、Green Cheung@AdmiX（蘇玉華）
場地：香港藝術中心

-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港