俄仔Ansheles噚晚喺銅鑼灣舉行第一次fans聚會，有近百人出席，主要係一齊影相、傾偈同玩遊戲，現場又播住佢為ViuTV主持嘅《返歸啦俄仔》節目。着住白色連身衫嘅Ansheles講笑話，最緊要着得舒服同自己鍾意，第一次同fans見面，希望多啲人嚟到。現場俄仔收到唔少禮物，其中有個女fans將俄仔同狗狗嘅樣做咗個積木擺設，另一個女fans就帶埋個烏克蘭老公到場支持，而當中有位男fans生日，俄仔即場用中文寫咗生日快樂嘅卡送畀對方。

來自俄羅斯嘅Ansheles，因為世界盃而多咗工作邀請，佢話最近開始搞自己個網站，同時亦有做慈善工作，亦準備緊一啲工作meeting。問到係咪多咗fans?佢話：「o依家喺街上都成日見到啲fans，網上平台亦有問必答，我哋見面好似朋友咁，fnas大多數都係香港女仔，今晚着主着白色衫，我都驚佢哋化晒妝，太熱情令到我件衫變咗彩色，不過件衫都係二手店買，佢哋通常都係想見下錫下攬下，希望可以照顧晒佢哋要求。」

精選娛聞，喺晒《娛果》
http://fb.com/appledailyent