巴西球星尼馬今季加盟巴黎聖日耳門（PSG）後，同烏拉圭射手卡雲尼爆出爭射罰球同12碼嘅風波，不過星期三主場對拜仁慕尼黑嘅歐聯分組賽，兩大前鋒勢將一齊正選為PSG披甲。

尼馬個幾星期前喺PSG贏里昂2:0嘅法甲聯賽同卡雲尼爭射12碼，後者堅持自己主射但最終射失，之後傳出尼馬要求會方賣走卡雲尼，上場聯賽喺尼馬因為輕傷缺陣之下，PSG同蒙彼利埃賽和0:0，今季七場比賽第一次失分。但係尼馬星期二有參與PSG操練，對拜仁嘅歐聯分組賽勢將同卡雲尼以及基利安麥巴比組成嘅三叉戟正選攻堅。

PSG領隊艾馬利喺賽前記者會度話︰「尼馬會喺星期三踢呢場比賽嘅隊伍入面，我已經同佢哋講過，佢哋知道應該點做。」另外，已經休戰差不多三個星期嘅迪馬利亞，相信亦會喺今場比賽亮相。