【土瓜灣→西貢】張景淳簽咗無綫八年都冇乜知名度，2011年拍劇集《天與地》飾演少年家明先開始有人留意。不過，最近因為佢同前HotCha成員張惠雅（Regen）、正印宋雙佳嘅感情事，加上本報讀者公開爆佢喺加拿大讀書時代嘅暴行，佢嘅見報率突然大增。
張景淳前日中午12點半揸車由佢住嘅西貢區村屋，直駛去到土瓜灣搵車房師傅將貼咗深色玻璃貼嘅車窗拆落嚟，全部換番透明玻璃，佢自己亦同架車一齊「變身」，喺本來光禿禿嘅頭頂加咗個假髮，變番「家明」。
當日張景淳將車放喺車房後，一個人喺街蕩來蕩去，買完果汁又去睇水果，全程冇乜表情嘅佢明顯仲係心事重重，但見到有婆婆推紙皮車喺佢身邊經過，佢都有幫婆婆推車，最後佢選擇搵間茶餐廳坐低等攞車，前後喺土瓜灣「磨」咗大約兩個鐘，終於可以攞番架車返屋企。
不過，張景淳揸車返屋企時發現記者，情緒又有啲波動，差唔多返到時突然喺斜路停車，見到記者想上前搵佢，佢又突然踩油走人，入到村後就邊行邊大叫：「何生，有人搞事呀！有記者入咗嚟呀！」佢急步跑上樓之後，就有一個中年惡漢走出嚟鬧記者：「你哋做乜Ｘ嘢呀！呢度係私人地方！」

聞復合即掛線

噚日張景淳覆本報打電話：「我都好想同你哋講，但係公司嘅立場，我唔方便同你講。」問佢係咪同宋雙佳復合，佢都唔肯答就收線。佢又用「我決定要站起來去面對」做標題喺微博貼文，宋雙佳都有留言話：「黎明前總是最黑暗的時刻……熬過去就會看到美麗的日出。」大家都以為宋雙佳同佢和好如初，但宋雙佳又寫咗大篇嘢，暗示同張景淳只存在親情，咁即係佢哋已經分手喇！
採訪、攝影：吳耀輝、黃曉程