呢條橋幾好噃,原來補習可以用咁嘅方法,夠晒「規模經濟」,唔怪得補習學校會賺到咁多錢。學生Y讀嘅學校,亦係沙田地區名校,會考成績素來唔錯,表哥問學生Y去唔去聽「健與羅渣」教英文,學生Y話:「有乜好處呀,睇影帶啫;之不過,有百幾個會考班同學都去咗補,我似乎有啲蝕底噃!」
問題就在這裏,學生Y要與阿媽、表哥開會,研究應否補習。阿媽話:「咁多同學去補習,不如你都參加啦,以免落後於人。」表哥當年自恃英文好,冇補英文,因「聆聽」(Listening)攞E,幾乎飲恨,至今百思不得其解,但冇所謂咯,已經攞咗倫敦大學碩士學位,重記住呢啲瘀嘢做乜?表哥亦叫學生Y去補習噃:「補習先生會提供賽馬貼士,例如李華《弔古戰場文》係熱膽,冷腳係新詩三首,大冷門係黃國彬寫《聽陳蕾士的琴箏》,有時好準㗎,中咗就攞梗A啦!」學生Y聽咗為之大笑;香港讀書,係咁㗎啦,讀書唔係求知識,係為咗會考盡量攞A。