搭電車兩蚊雞就可以由上環去到筲箕灣，鍾意遊車河就真係抵到爛。不過呢支歌仔，可能唔可以唱得幾耐。電車公司董事總經理夏睿德噚日同八方講，向政府申請加價暫時冇乜聲氣，不過會追到底。

換緊急煞車系統

電車係香港特色，唔少遊客都會搭。電車公司話會推出新乘客資訊系統，所有車站加設站牌，車上裝埋LED顯示屏同車上廣播，通知乘客去到邊個站，仲會換上新嘅電車路線圖，等遊客知道附近有乜景點。
電車公司又打算額外加裝電磁軌道緊急煞車系統。一直沿用咗成百年嘅煞車系統，如果以每小時30公里車速行車，車長睇見有緊急狀況，可以喺15公尺內煞停部電車，新系統就可以將煞車距離縮短至10公尺。
秋冬時節坐電車吹吹風都幾浪漫，但香港夏天大熱天時，搭冇冷氣嘅電車有時真係熱到身水身汗。電車公司其實都有諗過裝冷氣，聽講話連政府嗰關都過埋，不過諗到可能因此要大幅加價，仲有閂晒啲窗，冇晒原來嘅特色，電車公司決定唔搞住。