繼韓劇《結婚契約》女星UIE今日宣佈跟混血男星康男分手後，男子組合FT Island嘅27歲成員崔鍾訓亦於今日認已跟23歲前體操美女運動員孫延在分手。

崔鍾訓6月時被爆撻着孫延在，被韓媒《Dispatch》公開二人於日本嘅約會照，當時有指二人2月時經朋友介紹相識，相識第二個月即開始拍拖。不過今日崔鍾訓方面就爆出二人早已分手。

相關人士今日透露，其實崔鍾訓跟孫延在被爆戀情後，孫延在因為感到好有負擔，二人隨後已經分手。據知崔鍾訓早前於日本舉行粉絲見面會時，於台上親自宣佈已分手嘅消息，又表示：「想向各位粉絲講一啲真心話。對方感到好有負擔，男女交往或者分手都係好自然嘅事情，以後會成為更成熟嘅崔鍾訓。」

而崔鍾訓所屬事務所就表示：「二人大約於兩星期前分手。」

由於今日先後有兩對明星情侶宣佈「分訊」，網民都留言指今日係「世界分手日」，更有網民陰謀論，猜測韓國可能又有醜聞要借明星嘅分手新聞嚟轉移視線。