第一次出賽,阿B話:「有機會贏,不過騎師水皮,買少少試吓先。」隻馬出閘第尾,轉彎大波歐,跑第尾返嚟。第二次出賽,隻馬二十五倍,阿B話:「我話隻馬可以贏晒,點解會咁冷嘅?你買多啲都唔怕。吩咐華人騎師沿途守住三四位,轉正直路搵空檔,剩番三百米就打鞭,打八鞭就可以頭馬過終點。」老馬主半信半疑,落注兩萬win,騎師依足阿B指示,打咗六鞭已經超越前領馬,推多兩下就贏咗。
第三次出快活谷,阿B叫老馬主班大隊入場慶祝,隻馬熱到兩倍半,老馬主覺得熱得滯,驚有風險,阿B竟然同佢講:「按咗你間屋嚟落注。」法國騎師唔知係唔係聽到呢句說話,有壓力,搏命打鞭,贏咗八個馬位,老馬主為之大喜,既贏大錢又喺朋友面前威到盡,做馬主最開心莫過於此。但阿B黑口黑面咁鬧個法國騎師,話佢贏咁多個馬位,隻馬一定大加分,損失一場額外頭馬!老馬主話阿B離港之後,入場好似冇咗支探射燈,久之就少咗興趣矣。