早排告達理馬房有賽駒退役及拉走，養馬量跌至21匹，都咪話唔驚，但最近告達理贏「包勝」之餘，近日養馬量更急彈至26匹，多咗5駒咁多，可算灑下及時雨。

原來這5駒都是剛抵港的B布馬，計為B265、B282、B291、B295、B300，全未命名，不過若不急進，今季內不用不出擊的話，如告達理今季成績不達標，下季冇牌，這5駒便益了下家了。

其中B282馬主是「跑得」系的劉寶文與吳慧思，廐侶「馬跑得」早前剛停課數天，現仍處踱步階段，暫未知何日復出，不過今晚（27日）告達理有匹同主之「靚跑得」上陣，跑第六場三班1000米，配柏寶排6檔。

「靚跑得」上仗初跑谷中1000米，雖然尾二過終點，但只負2.75馬位，馬會賽後評語謂「出閘僅屬普通，居中間之後位置，走內欄。持續上前至終點」。

「靚跑得」以往在澳洲十戰，勝900及1000米，跑1000米以上則贏不到，可見力短，所以在港跑1000米應最合。既然上次表現是來港最好一次有進步，告達理最近亦贏「包勝」有轉運跡象，「靚跑得」勿太過睇低。