今日係大年初四,亦都係新年假期嘅最後一日喇,蘋果娛樂仝人祝大家馬年工作順利,身體健康先!
今年好多人嘅祝福都係好似好hea咁祝對方「馬上有乜」、「馬上有物」咁樣,食到字之餘又係萬能key,不過話晒過年,至緊要都係講嘅有心,聽嘅又開心就得啦。
同西班牙藉老公Sergio一齊喺香港迎馬年嘅GiGi梁詠琪似乎都係玩食字,不過好似又唔止咁簡單喎。話說GiGi帶老公去咗行年宵,大年初二又一齊睇煙花,話係兌現咗兩個承諾咁話。
不過到凌晨一點鐘左右,佢又貼咗張大合照出嚟,仲寫道:「有看到馬上有甚麼嗎?」拿拿拿,又玩食字喇,係「隻馬上面」有乜嘢?定係祝福大家「馬上乜乜」?又或係……GiGi話自己,「馬上會有乜嘢……」呢?
好喇,睇番張相,究竟馬上有乜嘢呢?其實隻馬(擺設)上面,就係GiGi扶住個可愛小BB,老公Sergio就抱住隻狗仔,所以好多網民都即刻估,GiGi似乎暗示自己有咗馬B咁喎。
到今日中午,GIGI又喺FB再貼一次圖同文「有看到馬上有甚麼嗎?哈哈!」,當然大家都係「馬上恭喜」,同「馬上祝賀」啦!