煲呔正式登場，由賭王鳴鑼開道，喝退其他滋事分子唔好同煲呔爭參選！
無論係兩年定五年，煲呔都冇得表態，不過賭王就經已揭盅，話係「二加五加五」，即是做十二年！咁嘅噩耗，對於班土共老左，簡直晴天霹靂，諗諗吓，若然現時唔郁手，先發制人，將煲呔扼殺在搖籃之中，港英餘孽治港，分分鐘會變為結構性！
賭王咁講，絕有道理！因為煲呔呢個「細曾」上頭，重有一個超級赤色「大曾」，係煲呔保家！兩年之後，煲呔若然冧檔，咁即是話坐鎮北京嘅「大曾」佢眼光奇差，正如江太祖力撐廢董，煲呔一坐上個位，若然冇大差池（以煲呔性格，重大政治事件如普選及23條，乜都會請示，全港市民都知道係大曾或壽爺揸弗，煲呔又會有乜大差錯？）就一定唔會在○七年落台！
所以反煲呔曾，亦即是反胡溫曾，挺曾即是真愛國呢，何鴻燊今次就表現出最徹底及最堅定嘅高尚愛國情操嘞！